काठमाडाैं- ठगीको आरोपमा सार्वजनिक लेखा समितिका सभापति ऋषिकेश पोखरेलका स्वकीय सचिव अनिलकुमार पोखरेल पक्राउ परेका छन् ।
बिहीबार जिल्ला प्रहरी कार्यालय, मोरङको टोलीले विराटनगरबाट पोखरेललाई पक्राउ गरेको हो । जिल्ला प्रहरी कार्यालय मोरङका प्रवक्ता एवं डीएसपी वेदप्रकाश जोशीले पोखरेललाई पक्राउ गरी अनुसन्धान सुरु गरेको बताए ।
पोखरेलमाथि एमबीबीएस अध्ययनका लागि छोरीको भर्ना गराइदिने बहानामा सप्तरीका बौआलाल चौधरीबाट ३८ लाख ८० हजार रुपैयाँ ठगी गरेको आरोप छ । सो प्रकरण बाहिरिएपछि गत शुक्रबार उनी स्वकीय सचिवबाट बर्खास्तीमा परेका थिए ।
यसबारे उच्च अदालत विराटनगरले पोखरेललाई पक्राउ गरी प्रहरीलाई अनुसन्धान गर्न आदेश दिएको थियो । ठगीको आरोपमा पक्राउ पुर्जी जारी भएपछि लेखा समिति सभापति पोखरेलले अनिललाई आफ्नो स्वकीय सचिवबाट हटाएका थिए ।
मोरङको रंगेली नगरपालिका-२ का ४३ वर्षीय पोखरेल एमालेको मोरङ जिल्ला कमिटी सदस्य पनि हुन् ।