हामीजसो धेरैको दैनिक नुहाउने बानी हुन्छ । कतिपयले त दैनिक ननुहाइकन दिनचर्या नै सुरु गर्दैनन् । अमेरिकामा दुई तिहाइ मानिसले दैनिक नुहाउने गर्छन भने अष्ट्रेलियमा ८० प्रतिशत मानिसले दैनिक नुहाउँछन् भन्ने तथ्यांक छ । तर, चीनमा भने अधिकांशले हप्ताको दुईपटकमात्र नुहाउँछन् भन्ने तथ्यांक छ ।
पूवीय विज्ञानले पनि दैनिक स्नान गर्नुलाई स्वस्थकर मान्ने गरेको छ । यद्यपी साबुन वा स्याम्पुको प्रयोग गरेर नुहाउने कुराको पूर्वीय परम्पराले भनेको भने होइन । धेरै मानिसलाई दैनिक नुहाँउदा स्वस्थ भइन्छ भन्ने लाग्छ । कतिपय भने शरीरमा ताजगी ल्याउनकै लागि भएपनि नुहाउने गर्दछन् ।
हार्वड विश्वविद्यालयका मेडिकल स्कुलको न्यूज लेटरमा प्रकाशित एक लेखले दैनिक नुहाउनु स्वस्थकर नहुने र त्यसले शरीरमा हानी गर्नसक्ने तर्फ सचेत गराएका छन् । मानिसको शरीरमा एक प्रकारको चिल्लो पदार्थ उत्पादन भइरहन्छ र त्यो सँगै सकरात्मक व्याक्टेरियाको पनि विकास हुनेगर्दछ । तर, प्रत्येक दिन साबुन वा स्याम्पुको प्रयोगले नुहाउँदा शरीरमा रहने चिल्लो पदार्थ र व्याक्टेरियापनि नष्ट हुने हुँदा त्यसले शरीरको वातावरणमा अन्तरघुलन हुनसक्ने प्राकृतिक क्षमतालाई असन्तुलित बनाउँदै लान्छ । जसले गर्दा सामान्यतया शरीर चिलाउने, सुख्खा हुने तत्कालिन समस्या निम्त्याउँछ भन्ने विज्ञहरुको अनुभव रहेको छ ।
हार्वड मेडिकल स्कुलका विशेषज्ञ डा. रोबर्ट एच सेमर्लिङ् भन्छन् ‘बारम्बार नुहाउँदा साबुन स्याम्पु र पर्फ्यूमले गर्ने अतिरिक्त रासायनिक असर त छँदैछ त्यसबाहेक शरीरमा सामान्य ब्याक्टेरिया र चिल्लो पदार्थ नष्ट हुँदा मानिसको रोगप्रतिरोधी क्षमता कमजोर हुँदै जाने खतरा पनि रहन्छ ।’
