ओडिशा – भारतको कटकस्थित एससीबी मेडिकल कलेज एवं अस्पताल मा आगलागी हुँदा कम्तीमा १० जनाको मृत्यु भएको छ।
भारतीय सञ्चारमाध्यमका अनुसार अस्पतालको ट्रमा केयर सेन्टरमा लागेको आगोका कारण यो मानवीय क्षति भएको हो।
मोहनचरण माझी, ओडिशा का मुख्यमन्त्रीले प्रारम्भिक जानकारी दिँदै विद्युत् चुहावट (इलेक्ट्रिकल सर्ट सर्किट) का कारण आगलागी भएको हुनसक्ने बताएका छन्। उनका अनुसार ट्रमा केयर सेन्टरसँगै रहेको आईसीयूमा त्यतिबेला २३ जना बिरामी उपचाररत थिए।
मुख्यमन्त्री माझीका अनुसार आगलागीको घटनामा सुरुमा सात जनाको मृत्यु भएको थियो। त्यसपछि आईसीयूमा रहेका बिरामीहरूलाई अन्य स्थानमा सारिएको थियो। तर स्थानान्तरणपछि थप तीन जनाको मृत्यु भएपछि मृतक संख्या १० पुगेको उनले जानकारी दिएका छन्।
घटनापछि अस्पताल परिसरमा अफरातफरी मच्चिएको थियो भने बिरामी तथा स्वास्थ्यकर्मीलाई तत्काल सुरक्षित स्थानमा सारिएको थियो।
मुख्यमन्त्री माझीले घटनाको न्यायिक छानबिन गर्ने आदेश दिइसकेको र दोषी पाइएमा सम्बन्धित व्यक्तिमाथि कडा कारबाही गरिने बताएका छन्।
