काठमाडौं- अक्टोबर महिनालाई पिङ्क अक्टोबर भनेर पनि चिनिन्छ । यो महिनामा विशेषगरी माहिलालाई हुने स्तन क्यान्सरको बारेमा जानकारी दिने गरिन्छ । महिलालाई स्तन क्यान्स हुँदा कस्ता लक्षणहरू देखिन्छन् भन्ने विषयमा विशेषगरी यो महिनामा जनचेतनामूलक कार्यक्रम गरिन्छ ।
यसैगरी यो महिनामा स्तन क्यान्सर जितेर आएकाहरूलाई बधाई तथा हौसला प्रदानका कार्यक्रमहरु पनि गरिन्छ । यसै सन्दर्भमा नेपाल क्यान्सर हस्पिटलले पनि एउटा कार्यक्रम गरेको छ । आज उक्त कार्यक्रम हार्ड रक क्याफेमा ‘पिङ्क दिपप्रज्वोलन कार्यक्रम’ सम्पन्न भएको हो ।
नेपाल क्यान्सर अस्पतालका स्तन क्यान्सर कार्यक्रम निर्देशक तथा स्तन क्यान्सर विशेषज्ञ डा. प्रफुल्ल शाक्यका अनुसार हार्डरक क्याफेसँग मिलेर पिङ्क अक्टोबर उत्सव मनाइएको हो । उनका अनुसार स्तन क्यान्सर जितेकाका साथै सबै क्यान्सर विजेताहरूको लागि यो उत्सव आयोजना गरिएको हो ।
अक्टोबर महिनामा स्तन क्यान्सरको बारेमा जनचेतना जगाउने कार्य गरिने उनले बताएका छन् ।
उनले क्यान्सर के हो ? लागेको कसरी थाहा पाउने ? कसरी उपचार हुन्छ ? भन्ने जस्ता विषयमा जानकारी गराइएको बताए । उनले स्तन क्यान्सरको बारेमा बुझ्न सबैलाई अनुरोध गरेका छन् । स्तनमा केही समस्या भएको शंका लागेमा डाक्टरको सल्लाह लिनुपर्ने उनी बताउँछन् ।
समयमै उपचार गरियो भने क्यान्सर निको हुने उनको भनाइ रहेको छ । त्यसैले वर्षमा एकचोटी सबैले आफ्नो स्तनको परीक्षण गर्नुपर्ने डा शाक्यको सुझाव छ ।
अहिलेको अवस्थालाई हेर्दा महिलालाई हुने सबैभन्दा ठुलो समस्या स्तन क्यान्सर देखिएको छ । यसमा सबै व्यक्ति सजक हुन जरूरी रहेको उनले बताए ।