काठमाडौँ, २६ कात्तिक । गाजाको एक अस्पतालमा बिजुली काटिँदा दुई शिशुको मृत्यु भएको छ ।
इजरायल–प्यालेस्टाइनको लडाईमा इजरालले गाजाको अल शिफा अस्पतालको विद्युत् कटौती गर्दा दुई प्रि–म्याच्योर(समयपूर्व जन्मिएका) शिशु को मृत्यु भएको र अन्य ३७ जना नवजात शिशु जोखिममा रहेको अन्र्तराष्ट्रिय सञ्चार माध्यम अलजजिरामा उल्लेख छ ।
विद्युत् कटौतीपछि इन्टेशिभ युनिटले काम गर्न छोड्दा ती शिशुहरुको मृत्यु भएको थियो । हाल अस्पतालमा वैकल्पिक विद्युत् सञ्चालनका लागि इन्धन समेत सकिसकेको निर्देशक मोहम्मद अबू सल्मियाले बताएका छन् । वैकल्पिक ऊर्जाका लागि सञ्चित इन्धन आइतबार बिहानसम्म मात्रै पुग्ने बताउँदै उनले यसकारण बिजुली अभावमा बाँकी अन्य ३७ नवजात शिशु पनि मृत्युको जोखिमा रहेको जनाए ।
‘दुर्भाग्यवश् हामीले पावर आउटेजका कारण ३९ मध्ये अत्याधिक गहन हेरचाहको आवश्यक पर्ने दुई प्रिम्याच्योर शिशुहरु गुमायौं’, उनले भने । बिजुली मार्फत न्यानो तापक्रम र अक्सिजनको निरन्तर प्रवाह हुने इन्क्युबेटर बन्द भएपछि ती शिशुहरुको मृत्यु भएको अस्पतालले जनाएको छ ।
अस्पतालका अनुसार विद्युत् कटौतीकै कारण अस्पतालमा भन्टिलेटरका एक वयस्क बिरामीको समेत मृत्यु भएको छ ।
प्यालेस्टाइनसंगको लडाईमा हाल इजरायलले अस्पताल घेराबन्दीलाई आफ्नो मुख्य लक्ष्य बनाएर हमला गर्न थालेको छ ।
