भक्तपुर- यहाँका सुकुमबासी राखिएको दुई शिविरमा चिकित्सकसहितको स्वास्थ्य टोलीले स्वास्थ्य परीक्षण र उपचार शिविर सञ्चालन गरिएको छ ।
मध्यपुरथिमि नगरपालिकास्थित कृषि विकास तालिम केन्द्रको भवन र खरिपाटीस्थित चाँंगुनारायण नगरपालिकास्थित नेपाल विद्युत् प्राधिकरणको तालिम केन्द्रमा राखिएका सुकुमबासी शिविरमा स्वास्थ्य परीक्षण शिविर सञ्चालन गरिएको हो ।
बागमती प्रदेश स्वास्थ्यमन्त्री किरण थापामगर र स्वास्थ्य सचिव डा सुमित्रा गौतमले तत्काल भक्तपुरका दुई सरकारी कार्यालयमा राखिएका सुकुमबासी शिविरमा स्वास्थ्य परीक्षण गर्न निर्देशन दिएलगत्तै आइतबार बिदाका दिनसमेत चिकित्सकको टोली दुवै सकुम्बासी शिविरमा पुगेर स्वास्थ्य परीक्षण सुरु गरेको जिल्ला जनस्वास्थ्य कार्यालय प्रमुख अञ्जना खड्काले जानकारी दिइन् ।
दुवै सुकुमबासी शिविरमा सुत्केरी महिलादेखि ज्येष्ठ नागरिकसमेतको स्वास्थ्य परीक्षण गरिएको बताउँदै उनले सुकुमबासीहरूमा मानसिक समस्या बढी देखिएको बताइन् । सोमबार पनि थप चिकित्सकहरूको टोलीले मानसिक तथा शारीरिक स्वास्थ्य सेवा र औषधि वितरण गरिने उनले जानकारी दिइन् ।