धरान- धरान उपमहानगरपालिकाले चिकित्सकको प्रेस्क्रिप्सन (निदानपुर्जा) बिना औषधी बिक्री–वितरण नगर्न औषधी व्यवसायीहरूलाई निर्देशन दिएको छ। जनगुनासोका आधारमा यस्तो अनियमित तथा गैरकानुनी गतिविधि रोक्न उपमहानगरपालिकाले कडाइका साथ सूचना जारी गरेको हो।
उपमहानगरपालिकाले औषधि बिक्री गर्दा चिकित्सकको सल्लाह अनिवार्य भएको स्मरण गराउँदै भनेको छ, “चिकित्सकको सल्लाहबिना औषधि बिक्री वितरण कार्य गैरकानुनी हो र यस्ता कार्यमा संलग्नहरूलाई कानूनी कारबाही गरिनेछ।”
स्वास्थ्य सुरक्षालाई प्राथमिकता दिनु पर्ने उल्लेख गर्दै औषधि व्यवसायीहरूलाई सचेत रहन भनिएको छ। साथै, स्वास्थ्य महाशाखालाई आवश्यक अनुगमन गरी प्रेस्क्रिप्सन बिना औषधि बिक्री गर्ने पसलहरूको पहिचान गरेर कारबाही प्रक्रिया अघि बढाउन निर्देशन दिइएको छ।
प्रशासन महाशाखा प्रमुख बेदप्रसाद सापकोटाले सार्वजनिक हितका लागि यो सूचना कार्यान्वयन गर्न आवश्यक पहल सुरु गरिएको जानकारी दिएका छन्।
