काठमाडौं- सरकारले आगामी वैशाख ३१ गते देशभरका सबै स्वास्थ्य संस्थामार्फत नियमित खोप छुटेका पाँच वर्षमुनिका बालबालिकालाई खोप दिने भएको छ।
स्वास्थ्य सेवा विभाग अन्तर्गत परिवार कल्याण महाशाखाको बाल तथा खोप शाखाका प्रमुख अभियान गौतमले बालबालिकाहरू खोपबाट नछुटून् भन्ने उद्देश्यले यो विशेष कार्यक्रम ल्याइएको जानकारी दिए।
सरकारले वैशाख महिनालाई ‘खोप महिना’को रूपमा मनाउँदै आएको छ। यसै सन्दर्भमा, खोप महिनाको अन्तिम दिनमा खोप छुटेका बालबालिकालाई समेट्ने योजना बनाइएको हो।
नेपालमा नियमित खोप कार्यक्रमको प्रभाव उल्लेखनीय देखिएको छ। पछिल्ला २७ वर्षमा पाँच वर्षमुनिका बालबालिकाको मृत्युदर ७८ प्रतिशतले घटेको छ। सन् १९९६ मा प्रतिहजार जीवित जन्ममा ११८ बालबालिकाको मृत्यु हुने दर रहेकोमा सन् २०२३ मा घटेर २६.५ मा झरेको छ।
त्यस्तै, शिशु मृत्युदर पनि ७१ प्रतिशतले घटेको छ — ७८ बाट २३ प्रति हजारमा झरेको छ। नवजात शिशु मृत्युदर ५० बाट घटेर १६.६ प्रति हजार जीवित जन्ममा झरेको छ, जुन झन्डै ६७ प्रतिशत कमी हो।
सरकारले आम अभिभावकहरूलाई समयमै स्वास्थ्य संस्थामा पुगी खोप लगाउन छुटेका बालबालिकालाई सहभागी गराउन आग्रह गरेको छ।