जुम्ला- जुम्लामा किशोरीहरूको स्वास्थ्य सुरक्षाका लागि पाठेघर क्यान्सर विरुद्धको एचपीभी खोप अभियान प्रभावकारी रूपमा सम्पन्न भएको छ । कुल ६,५०६ किशोरीले खोप प्राप्त गरेका छन्, जसले खोप अभियानप्रति व्यापक उत्साह दर्शाउँछ ।
यस खोप अभियानमा ६ कक्षा र १० वर्ष उमेर समूहका १,३७२ तथा ७ देखि १० कक्षा र ११-१४ वर्ष उमेर समूहका ५,१३४ किशोरी सहभागी भए । अभियानको प्रभावकारिता बढाउन जिल्लाका १६४ खोप सेसन सञ्चालन गरिए। माघ २७ देखि फागुन ७ गतेसम्म सञ्चालन भएको यो अभियान सरकारको राष्ट्रिय खोप कार्यक्रम अन्तर्गत जुम्लाका आठवटै स्थानीय तहमा लागू गरिएको थियो । जनस्वास्थ्य सेवा कार्यालय, जुम्लाका प्रमुख कृष्ण सापकोटाका अनुसार ६,७३९ किशोरीलाई लक्षित गरिएकोमा ९६.५४ प्रतिशतले खोप प्राप्त गरे ।
खोप लगाउने संख्याको विवरण अनुसार कनकासुन्दरी गाउँपालिकामा ८०० किशोरी (१०७.२४%), सिँजा गाउँपालिकामा ७१५ किशोरी (१०४.२३%), तातोपानी गाउँपालिकामा ६७३ किशोरी (१०२.२८%), गुठिचौर गाउँपालिकामा ४१५ किशोरी (९७.१९%), चन्दननाथ नगरपालिकामा १,४२७ किशोरी (९७.०७%), हिमा गाउँपालिकामा ८०८ किशोरी (९९.५१%), पातारासी गाउँपालिकामा ८०३ किशोरी (८९.८२%) तथा तिला गाउँपालिकामा ८६५ किशोरी (८२.७%) रहेका छन् ।
तर, २३३ किशोरी खोप प्राप्त गर्नबाट वञ्चित भए । जनस्वास्थ्य निरीक्षक प्रेमबहादुर सोमैका अनुसार पहिलो चरणमा चन्दननाथ नगरपालिका, गुठिचौर गाउँपालिका, पातारासी गाउँपालिका, तातोपानी गाउँपालिका र तिला गाउँपालिकामा माघ २७ गतेबाट खोप लगाउन सुरु गरिएको थियो। दोस्रो चरणमा सिंजा क्षेत्रका हिमा गाउँपालिका, सिंजा गाउँपालिका र कनकासुन्दरी गाउँपालिकामा फागुन १ गतेदेखि खोप लगाइएको थियो ।
खोप अभियान सफल बनाउनका लागि ३०३ स्वास्थ्यकर्मी तथा कर्मचारी परिचालन गरिएको थियो । तर, बिहानको अत्यधिक चिसोका कारण विद्यालय ढिलो खोल्दा केही किशोरीहरू खोपबाट वञ्चित भएको बताइएको छ ।
यस अभियानका लागि जुम्लामा ८,९२० भाइल खोप आइपुगेको थियो, जसले आगामी दिनमा बाँकी किशोरीहरूलाई पनि खोप प्रदान गर्ने सम्भावना बढाएको छ ।