रौतहट – रौतहटको गौर–१ स्थित गौर सेन्टर हस्पिटलमा डाक्टरको लापरबाहीले एक युवकको मृत्यु भएको आरोप लागेको छ । १८ वर्षीय लालु अधिकारीको आन्द्राको शल्यक्रिया (अप्रेसन) गर्ने क्रममा मृत्यु भएको दाबी गर्दै, मृतकका काका देवेन्द्र अधिकारीले घटना छानबिन गर्न माग गरेका छन् ।
देवेन्द्र अधिकारीका अनुसार, शनिबार पेट दुख्ने समस्याका कारण लालुलाई प्रादेशिक अस्पताल गौरमा भर्ना गरिएको थियो । प्रारम्भिक परीक्षणपछि डाक्टर घनश्याम ठाकुरले लालुको आन्द्रा फुटेको जानकारी दिएका थिए र थप उपचारका लागि उनले अन्य डाक्टर पंकज साहसँग सम्पर्क गर्न सल्लाह दिएका थिए । डाक्टर पंकज साहको निर्देशनमा, लालुलाई आन्द्राको अप्रेसनका लागि गौर सेन्टर हस्पिटल ल्याइएको थियो ।
शल्यक्रिया पश्चात केही समयमै बिरामीको अवस्था गम्भीर भएको जानकारी आएको देवेन्द्रले बताए। उनीहरूले प्रादेशिक अस्पतालका डाक्टर ठाकुरलाई पुनः बोलाएर अक्सिजन सहित एम्बुलेन्समा राखेर बिरामीलाई नेशनल मेडिकल कलेज वीरगञ्ज पठाउन सल्लाह दिए । शनिबार राति करीब ११ बजे, नेशनल मेडिकल कलेजमा पुगेपछि डाक्टरले लालुको मृत्यु भएको घोषणा गरेका थिए ।
घटनामा संलग्न डाक्टर फिरोज अन्जुम र पंकज साहसहितको चिकित्सक टोली सम्पर्कविहीन रहेको जानकारी दिँदै देवेन्द्रले घटनामा शंका व्यक्त गरेका छन् र दोषी चिकित्सक र अस्पताल प्रशासनमाथि कारबाहीको माग गरेका छन् ।
यस घटनामा प्रादेशिक अस्पतालका मेडिकल सुपरिटेन्डेन्ट डाक्टर मुरारी ठाकुरले, बिरामीलाई रिफर गर्दा नारायणी अस्पतालको सट्टा गौरकै निजी अस्पतालमा पठाइएको कुरा अनुसन्धानको विषय भएको बताए । यस घटनामा अस्पताल विकास समितिका अध्यक्ष अनवर हासमीले डाक्टर ठाकुर, साह र अन्जुमसँग लिखित स्पष्टीकरण सोध्ने प्रक्रिया अघि बढाइएको जानकारी दिएका छन् ।