नेपाल दक्षिण पूर्वी एशिया क्षेत्रमा सूर्तिजन्य पदार्थमा सबैभन्दा कम कर लगाउने मुलुक भएको भन्दै विश्व स्वास्थ्य संगठनले चिन्ता व्यक्त गरेको छ ।
संगठनले सूर्तिजन्य पदार्थमा न्यूनतम ७५ प्रतिशत कर लगाउने मापदण्ड बनाएपनि नेपालमा न्यून कर लिने गरेको भन्दै चिन्ता व्यक्त गरेको हो । राजधानीको सोल्टी होटलमा सोमबार आयोजित दोश्रो स्वास्थ्य सम्मेलनमा बोल्दै विश्व स्वास्थ्य संगठनको नसर्ने रोग, मानसिक स्वास्थ्य र दुर्घटना न्यूनिकरण सम्बन्धी विभागका प्रमुख ग्याम्पो दोर्जेले नसर्ने रोग सम्बन्धी कार्ययोजना लागू गरेपनि नेपालले कर अभिवृद्धिमा भने निर्णय लिन नसकेको बताए ।
‘विश्वका कतिपय देशमा १ सय ५० प्रतिशतसम्म कर उठाउने गरिएको छ । तर, नेपालमा ७५ प्रतिशत पनि नपुर्याइनु चिन्ताजनक विषय हो ।’ दोर्जेले भने । ‘नेपालमा हाल सरकारले सूर्तिजन्य पदार्थमा ३२ प्रतिशतमात्र कर उठाउने गरेको छ ।’
त्यस्तै, नेपालमा मृत्युको ठूलो हिस्सा नसर्ने रोग भएको भन्दै दोर्जेले अस्वस्थकर खानपान, विलासी जीवनशैली, मोटोपना जस्ता कारणले भविष्यमा यो थप भयावह बन्दै जाने उनले बताए ।
‘नेपालीले औषधि उपचारमा अझैपनि सय रुपैयाँमा ५४ रुपैयाँ आफ्नै खल्तीबाट हाल्नुपर्ने अवस्था छ । यो पनि जनस्वास्थ्य प्रवर्धनका दृष्टिकोणबाट निराशाजनक छ ।’ दोर्जेले चिन्ता व्यक्त गरेका छन् ।
