काठमाडौँ – नेकपा (एमाले) ले गाजास्थित अस्पतालमा भएको आक्रमणको निन्दा गरेको छ । बुधवार एक विज्ञप्ति जारी गर्दै एमालेले अस्पतालमा उपचार गराइरहेका बिरामी, चिकित्सक तथा स्वास्थ्यकर्मी, बिरामीका कुरुवा/आफन्त र अस्पताल परिसरमा शरण लिइरहेका नागरिक मारिएका घटनाको निन्दा गरेको हो ।
पार्टी अध्यक्ष केपी शर्मा ओलीको हस्ताक्षर रहेको उक्त विज्ञप्तिमा रकेट आक्रमणबाट ठूलो विस्फोटसहित सिङ्गो अस्पताल भवन नष्ट हुनाका साथै बालबालिकासहित सयौँ हताहत भएको विषय जति निन्दा गरे पनि कमी हुने उल्लेख गरिएको छ ।
‘जुनसुकै समस्याको समाधान शान्ति वार्ताद्वारा गरिनुपर्छ, निहत्था नागरिक, अस्पतालमा उपचार गराइरहेका बिरामी र स्वास्थ्यकर्मीको ज्यान लिने गरी गरिएको अमानवीय आक्रमणबाट अन्तर्राष्ट्रिय कानुन, मानव अधिकार र मानवीयताका सबै सीमा उल्लङ्घन भएको छ’, विज्ञपितमा उल्लेख छ ।
घटनामा उद्धार तथा आपतकालीन सहयोगका लागि गाजापट्टीमा मानवीय सहायता प्रदायक निकायलाई आवागमनका लागि अनुमति दिनुपर्छ भन्ने मान्यता आफ्नो पार्टीको रहेको ओलीले स्पष्ट पारेका छन् ।
