कर्मचारी र व्यापारी मिलेर सूर्तिजन्य पदार्थमा कर बढाउन दिएनन्- स्वास्थ्यमन्त्री बस्नेत

काठमाडौं,१७ जेठ । स्वास्थ्य तथा जनसंख्या मन्त्री मोहनबहादुर बस्नेतले सूर्तिजन्य पदार्थमा यथोचित कर बढ्न नसक्नुमा कर्मचारीतन्त्र जिम्मेवार भएको आरोप लगाएका छन् ।
विश्व सूर्तिजन्य पदार्थ रहित दिवसको अवसरमा स्वास्थ्य सेवा विभाग टेकुमा आयोजित कार्यक्रममा बोल्दै मन्त्री बस्नेतले अर्थ मन्त्रालयका कर्मचारीका कारण कर बढ्न नसकेको दावी गरे ।आफुले सूर्तिजन्य पदार्थमा कम्तिमा ६० प्रतिशत कर बढाउन अनुरोध गरेपनि अर्थ मन्त्रालयका कर्मचारीले १० प्रतिशतमात्र वृद्धि गर्न भनेकाले यथोचित वृद्धि गर्न नसकेको अर्थ मन्त्रीले जवाफ दिएको मन्त्री बस्नेतको भनाइ छ ।
उनले भने, म भन्छु मलाई कसैको डर छैन । यहाँका व्यूरोक्रेसी नै व्यापारीसँग मिलेका छन् । उनीहरुले कर बढाउन दिएनन् ।’
मन्त्री बस्नेतले सूर्तिजन्य पदार्थका विरुद्ध अभियान नै चलाउनुपर्नेमा जोड दिए ।
कार्यक्रममा सूर्तिजन्य पदार्थका विरुद्ध क्रियाशिल विभिन्न व्यक्ति एवं संस्थालाई सम्मान गरिएको छ ।