काठमाडौं, ७ जेठ । प्रमुख प्रतिपक्षी पार्टी नेकपा एमाले अध्यक्ष केपी शर्मा ओलीले सरकारको शिक्षा नीतिका कारण ९० भन्दा धेरै नर्सिङ्ग कलेज बन्दै भएको भन्दै कडा आलोचना गरेका छन् ।
सरकारले ल्याएका आगामी आर्थिकवर्षको नीति तथा कार्यक्रममाथि आइतवार संसद बैठकमा टिप्पणी गर्दै अध्यक्ष ओलीले सरकारको शिक्षा नीतिका कारण विद्यार्थीहरु विदेशिन वा विदेशी विश्वविद्यालयमा पढ्न विवश भएको आरोप लगाएका हुन् ।
डा. केसीको आन्दोलनपश्चात बनेको चिकित्सा शिक्षा ऐनका प्रावधानप्रति लक्षित गर्दै अध्यक्ष ओलीले सरकारी नीतिका कारण अवस्था भयावह भएको बताए । अध्यक्ष ओलीले देशभित्रैको मेडिकल कलेजले सम्बन्धन नपाउँदा विदेश विद्यार्थी पठाउने कन्सल्टेन्सी फस्टाएको टिप्पणी गरे ।
उनले भने, ‘९० वटाभन्दा नर्सिङ्ग कलेज बन्द भएका छन् । मेडिकल कलेजले अफिलिएसन पाउँदैन । यहाँ १५ सय वटा कन्सल्टेन्सी छन् । २ सय भन्दा बढि विदेशी विश्वविद्यालयको पाठ्यक्रम पढाउने कलेज छन् । विद्यार्थीहरु गुणस्तर र अवसरको अभावमा विदेशिएका छन् । यस्तो शिक्षा नीतिले अफ्ठ्यारो बनाइरहेको छ ।’
डा. केसीको आन्दोलनका विषय सदैव आलोचनात्मक बनेका ओलीले आजको बैठकमा पनि घुमाउरो रुपमा चिकित्सा शिक्षा ऐनका प्रावधानले गर्दा मेडिकल शिक्षा संकुचित भउको धारणा संसदमा अभिव्यक्त गरेका हुन् ।
