काठमाडौं – शहीद दशरथ चन्द स्वास्थ्य विज्ञान विश्वविद्यालयको उपकुलपतिको लागि तीन पटकको विज्ञापनपछि अन्ततः दुई जनाले आवेदन दिएका छन्। शिक्षा, विज्ञान तथा प्रविधि मन्त्रालयका प्राविधिक तथा व्यावसायिक शिक्षा महाशाखाका उपसचिव सुरेश कुमार जोशीले यसबारे जानकारी दिएका छन्।
विश्वविद्यालयले उपकुलपति पदका लागि पहिलो पटक कात्तिक १६ गते आवेदन खुलाएको थियो। तर आवेदन नै नआएपछि दोस्रो पटक कात्तिक ३० गतेदेखि मंसिर ५ गतेसम्म आवेदन म्याद थपियो। दोस्रो पटक पनि आवेदन नआएपछि अन्ततः तेस्रो पटक मंसिर २४ गतेदेखि मंसिर २८ गतेसम्म आवेदन दिने विज्ञापन जारी गरियो।
उपसचिव जोशीका अनुसार, तेस्रो पटकको विज्ञापनपछि मात्रै दुई जनाले आवेदन दिएका छन्। अब विश्वविद्यालयले कार्यविधिअनुसार आवेदकहरूको योग्यता जाँच गरी उपकुलपति नियुक्ति प्रक्रिया अघि बढाउनेछ।
उपसचिव जोशीले भने, “हामी अब कार्यविधिअनुसार आवेदकको योग्यता पुगेको छ कि छैन भनेर जाँच गर्नेछौं। योग्यता पुगेको खण्डमा आवश्यक प्रक्रिया पूरा गरी उपकुलपति नियुक्ति हुनेछ।”
