बेइजिङ – कोरोना भाइरसका घाउ अझै ठिक नभएकाे अवस्थामा चिनियाँ वैज्ञानिकहरूले चमेरोमा एक नयाँ कोरोना भाइरस एचकेयू–५ सीओवी–२ पत्ता लगाएको बताएका छन्, जसले मानिसलाई संक्रमित गर्न सक्छ।
चिनियाँ वैज्ञानिकहरूको टोलीले चमेरोमा फेला परेको नयाँ कोरोना भाइरस मानिसमा सर्ने सम्भावना रहेको पत्ता लगाएका हुन् । यस अध्ययनको नेतृत्व वुहान इन्स्टिच्युट अफ भाइरोलोजीका प्रमुख वैज्ञानिक शिझेंगलीले गरेका थिए । यसअघि पनि कोभिड–१९ को फैलावट डब्ल्यूआईभीबाट भएको दावी गरिएको थियो ।
एचकेयू–५ सीओवी–२ एक नयाँ कोरोना भाइरसको प्रकार हो, जसको पहिचान पहिलो पटक हङकङमा जापानी पिपिस्ट्रेल चमेरोहरूमा गरिएको थियो। हङकङको साउथ चाइना मर्निङ पोस्टका अनुसार, यो भाइरस ‘मेर्बेको भाइरस’ नामक उपप्रकारसँग सम्बन्धित छ, जसमा मिडल ईस्ट रेस्पिरेटरी सिन्ड्रोम समेत समावेश छ।
सेल जर्नलमा प्रकाशित एक अध्ययनमा, सीको नेतृत्वमा रहेको टोलीले यो नयाँ भाइरसको दुई अलग-अलग वंश र जेनावेजी पहिचान गरेको छ, जुन चमेरो र मानिसमा मात्र होइन, अन्य स्तनधारी प्राणीहरूमा पनि फैलिन सक्छ ।
अन्वेषकहरूले पत्ता लगाएका छन् कि चमेरोबाट भाइरस पृथक गर्दा, यसले मानव कोशिका र कृत्रिम रूपमा बढाइएको कोशिका समूहलाई पनि संक्रमित गरेको देखिएको छ । न्यूज वीकमा प्रकाशित रिपोर्टका अनुसार, यस भाइरसको मानव एसीई २ रिसेप्टरसँग राम्रोसँग बाँध्ने क्षमता छ, जसले यसको खतरनाक बन्ने सम्भावना बढाउँछ। प्रयोगशालामा गरिएको परीक्षणमा यसले मानव कोशिका र अंगहरूमा संक्रमण फैलाउने क्षमता प्रदर्शन गरेको छ ।
एचकेयू–५ सीओवी–२ को खोजले यस तथ्यलाई पुष्टि गर्छ कि चमेरोमा पाइने कोरोना भाइरसहरूको निगरानी गर्नु अत्यन्त महत्त्वपूर्ण छ, किनकि तिनीहरू भविष्यमा मानिसहरूको लागि ठूलो खतरा बन्न सक्छन् ।
हाल, एचकेयू–५ सीओवी–२ भाइरसको तत्काल कुनै खतरा नआउने कुरा भनिएको छैन, तर वैज्ञानिकहरूले भविष्यमा यस्तो प्रकारका महामारीहरूबाट जोगिन सतर्क रहन र तयार रहन आग्रह गरेका छन् । यस बारेमा थप अनुसन्धान भइरहेको छ । चीनले कोभिड–१९ प्रयोगशालाबाट लीक भएको दावीलाई निरन्तर अस्वीकार गर्दै आएको छ, तर वुहान भाइरस इन्स्टिच्युटमा अनुसन्धान अझै जारी छ ।
