अर्जेन्टिना । अर्जेन्टिनाका महान् फुटबल खेलाडी डिएगो म्याराडोनाको मृत्यु प्रकरणमा उपचारमा लापरवाही गरेको आरोप लागेका सात स्वास्थ्यकर्मीविरुद्धको मुद्दामा अदालतले आगामी डिसेम्बर २२ मा फैसला सुनाउने भएको छ।
छ महिनासम्म चलेको सुनुवाइ बिहीबार समाप्त भएको हो। अन्तिम सुनुवाइका क्रममा म्याराडोनाकी छोरी डाल्माले आफ्ना बुबाले न्याय पाउने विश्वास व्यक्त गरेकी छन्। यता मुद्दाका मुख्य प्रतिवादी तथा म्याराडोनाका निजी चिकित्सक लियोपोल्डो लुकेले भने आफू निर्दोष रहेको दाबी गरेका छन्। उनले यस प्रकरणमा आफूलाई ‘बलिको बोका’ बनाइएको आरोपसमेत लगाएका छन्।
म्याराडोनाको सन् २०२० नोभेम्बर २५ मा ६० वर्षको उमेरमा निधन भएको थियो। हृदयाघात र फोक्सोमा तरल पदार्थ जम्ने समस्याका कारण उनको मृत्यु भएको थियो। मस्तिष्कको सानो शल्यक्रियापछि स्वास्थ्यलाभ गरिरहेका उनी ब्युनस आयर्सनजिकै टिग्रेस्थित निजी निवासमा बसिरहेका थिए।
गत अप्रिलमा सुरु भएको सुनुवाइका क्रममा ७० भन्दा बढी साक्षीले बयान दिएका थिए। अभियोजन पक्षले सात प्रतिवादीमध्ये छ जनालाई चारदेखि १२ वर्षसम्मको जेल सजाय माग गरेको छ। म्याराडोनाका निजी चिकित्सक लुकेका लागि सबैभन्दा बढी १२ वर्षको सजाय माग गरिएको छ।
प्रतिवादी पक्षले भने ध्वनि रेकर्डिङ, वैज्ञानिक लेख तथा शव परीक्षणको भिडियो प्रस्तुत गर्दै आफूमाथि लगाइएका आरोप अस्वीकार गरेको छ। उनीहरूको कानुनी टोलीले म्याराडोनाको मृत्यु प्रकरणमा स्वास्थ्यकर्मीहरूलाई फसाउन खोजिएको दाबी गरेको छ।
मुद्दाको मुख्य विषय म्याराडोनालाई अस्पतालमा राखेर उपचार गर्नुपर्ने अवस्थामा निजी निवासमा स्वास्थ्यलाभ गराउने निर्णय उचित थियो वा थिएन भन्ने रहेको छ। अभियोजन पक्षले म्याराडोनालाई राखिएको निवासमा अस्पतालको शय्या, मुटुको धड्कन नियमित गर्ने उपकरण र तत्काल उपलब्ध हुने एम्बुलेन्सजस्ता आधारभूत स्वास्थ्य सुविधाको अभाव रहेको विषयलाई उपचारमा लापरवाही भएको प्रमाणका रूपमा प्रस्तुत गरेको छ।
चिकित्सा विशेषज्ञहरूले म्याराडोनाको मृत्यु हुनुअघि शरीरमा तरल पदार्थ जम्ने, मुटुको धड्कन असामान्य रूपमा तीव्र हुने र सास फेर्न कठिनाइ हुनेजस्ता गम्भीर लक्षण देखिएको बयान दिएका थिए। उनीहरूका अनुसार ती लक्षणप्रति समयमै ध्यान दिई आवश्यक उपचार गरिएको भए उनको ज्यान जोगिने सम्भावना हुन सक्थ्यो।
म्याराडोनाको उपचारमा संलग्न स्वास्थ्यकर्मीहरूको भूमिका र उपचारका क्रममा अपनाइएका प्रक्रियाबारे अदालतले विभिन्न प्रमाण तथा साक्षीका बयान अध्ययन गरेको छ। अब डिसेम्बर २२ मा सुनाइने फैसलाले उनको मृत्युमा स्वास्थ्यकर्मीहरूको सम्भावित लापरवाहीसम्बन्धी आरोपबारे कानुनी निष्कर्ष दिनेछ।
