झापा – झापाको बिर्तामोडमा प्रहरीले ग्लोबल ओरियन्सको कार्यालयमा छापा मारेर ४१ जनालाई नियन्त्रणमा लिएको छ। अवैध रूपमा स्वास्थ्य जाँच तथा औषधि बिक्री–वितरण गर्दै नेटवर्किङ व्यवसायमार्फत सर्वसाधारणलाई ठगी गरेको आरोपमा प्रहरीले कार्यालयमा छापा मारेको हो।
बिर्तामोड नगरपालिका–५ बुद्धनगरस्थित ग्लोबल ओरियन्सको कार्यालयमा बुधबार दिउँसो करिब ३ बजे छापा मारिएको प्रहरीले जनाएको छ। छापा मार्ने क्रममा इलामका सुजन लिम्बू, जो अर्जुनधारा मल्टी पर्पोजका सञ्चालक रहेको बताइएको छ, ग्लोबल ओरियन्सका शाखा प्रमुख पीताम्बर कट्टेलसहित २२ महिला र १९ पुरुषलाई नियन्त्रणमा लिइएको हो।
प्रहरीले कार्यालयबाट विभिन्न प्रकारका औषधि, स्वास्थ्य जाँचमा प्रयोग हुने मेसिन, कागजात तथा केही नगदसमेत बरामद गरेको छ। नियन्त्रणमा लिइएका सबैलाई थप अनुसन्धानका लागि इलाका प्रहरी कार्यालय बिर्तामोडमा राखिएको प्रहरीले जनाएको छ।
प्रारम्भिक अनुसन्धानका क्रममा शैक्षिक परामर्श तथा तालिम सञ्चालन गर्ने उद्देश्यले स्थापना गरिएको अर्जुनधारा मल्टी पर्पोज नामक कम्पनीसँग सहकार्य गरी ग्लोबल ओरियन्सले स्वास्थ्य जाँच तथा औषधि बिक्री–वितरण गर्दै आएको खुलेको प्रहरीले जनाएको छ।
प्रहरीका अनुसार कक्षा १२ सम्म अध्ययन गरेका शाखा प्रमुख कट्टेलले ‘होलबडी चेकअप’ गर्ने भन्दै एउटा मेसिनबाट सर्वसाधारणको स्वास्थ्य परीक्षण गर्दै आएका थिए। स्वास्थ्य जाँच गरेबापत प्रतिव्यक्ति एक हजार रुपैयाँ शुल्क लिने गरेको प्रारम्भिक अनुसन्धानबाट खुलेको प्रहरीले जनाएको छ।
विभिन्न रोग निको पारिदिने दाबी गर्दै गाउँबाट आएका सर्वसाधारणलाई आकर्षित गर्ने र त्यसपछि स्वास्थ्य जाँच तथा औषधि बिक्री गर्ने गरेको हुन सक्ने प्रहरीको प्रारम्भिक निष्कर्ष छ।
घटनाबारे थप अनुसन्धान भइरहेको प्रहरीले जनाएको छ। पक्राउ परेकामाथि अवैध रूपमा स्वास्थ्य जाँच तथा औषधि बिक्री–वितरण गरेको र नेटवर्किङ व्यवसायका नाममा सर्वसाधारणलाई ठगी गरेको आरोपमा अनुसन्धान गरी आवश्यक कानुनी प्रक्रिया अघि बढाइने प्रहरीले जनाएको छ।
