काठमाडौँ – औषधि कम्पनी मर्क र मोडेर्नाले विकास गरिरहेको क्यान्सर खोपले छालाको क्यान्सर अर्थात् मेलानोमाविरुद्धको परीक्षणमा उत्साहजनक नतिजा दिएको छ। खोपलाई इम्युनोथेरापी औषधिसँग संयोजन गरेर प्रयोग गर्दा शल्यक्रियापछि क्यान्सर पुनः फर्किने जोखिम घटेको कम्पनीहरूले बताएका छन्।
‘इन्टिस्मेरान’ नाम दिइएको यो खोप उच्च जोखिमयुक्त मेलानोमा भएका बिरामीलाई शल्यक्रियापछि दिइएको थियो। प्रारम्भिक नतिजाअनुसार खोप र ‘किट्रुडा’ नामक इम्युनोथेरापी औषधिको संयुक्त प्रयोगले केवल किट्रुडा प्रयोग गर्ने बिरामीको तुलनामा क्यान्सर पुनः देखिने तथा शरीरका अन्य भागमा फैलिने जोखिम कम गरेको पाइएको छ।
तेस्रो चरणको परीक्षणमा दोस्रो, तेस्रो र चौथो चरणका मेलानोमा भएका एक हजारभन्दा बढी बिरामी सहभागी थिए। उनीहरूमध्ये केहीमा क्यान्सर एउटै स्थानमा ठूलो ट्युमरका रूपमा रहेको थियो भने केहीमा शरीरका अन्य भागमा समेत फैलिएको अवस्था थियो।
यो खोप प्रत्येक बिरामीको आफ्नै ट्युमरमा देखिएका विशेष आनुवंशिक परिवर्तनका आधारमा तयार गरिन्छ। त्यसका लागि शल्यक्रियामार्फत निकालिएको ट्युमरको नमुना परीक्षण गरी क्यान्सर कोषमा रहेका विशिष्ट परिवर्तन पहिचान गरिन्छ।
त्यसपछि सम्बन्धित बिरामीको क्यान्सर कोषलाई लक्षित गर्ने गरी खोप तयार गरिन्छ। खोपले शरीरको प्रतिरक्षा प्रणालीलाई बाँकी रहेका क्यान्सर कोष पहिचान गरी तिनमाथि आक्रमण गर्न सक्रिय बनाउने उद्देश्य राख्छ।
यस प्रविधिमा कोभिड–१९ विरुद्धका केही खोपमा प्रयोग भएको एमआरएनए प्रविधिको प्रयोग गरिएको छ। कम्पनीहरूका अनुसार प्रारम्भिक परीक्षणमा यसले बिरामीलाई लामो समयसम्म क्यान्सरमुक्त राख्न सहयोग गरेको देखिएको छ।
तर खोपको प्रभाव कति लामो समयसम्म कायम रहन्छ भन्ने अझै स्पष्ट भइसकेको छैन। विशेषज्ञहरूले परीक्षणको नतिजालाई उत्साहजनक माने पनि पूर्ण तथ्यांक सार्वजनिक हुन र स्वतन्त्र विशेषज्ञबाट समीक्षा हुन बाँकी रहेको बताएका छन्।
मर्क र मोडेर्नाले फोक्सो, मूत्राशय र मिर्गौलाको क्यान्सरका लागि समेत यस्तै खोपको परीक्षण गरिरहेका छन्। कम्पनीका अधिकारीहरूले पछिल्लो नतिजालाई क्यान्सर उपचार अनुसन्धानमा महत्वपूर्ण उपलब्धिका रूपमा व्याख्या गरेका छन्।
यद्यपि परीक्षण प्रक्रिया पूरा भएपछि नियामक निकायबाट स्वीकृति लिनुपर्नेछ। स्वीकृति प्राप्त भएपछि मात्रै यो उपचार सर्वसाधारण बिरामीका लागि उपलब्ध गराउने प्रक्रिया अघि बढ्नेछ।
