काठमाडौँ – चिकित्सा शिक्षा आयोगको बैठकले देशभरका सरकारी तथा निजी मेडिकल कलेजमा पोस्ट ग्राजुएट (पीजी), एमडी/एमएस, नर्सिङ्ग लगायत विषयहरूमा अध्ययन गर्ने विद्यार्थीको सिट (कोटा) औपचारिक रूपमा निर्धारण गरेको छ।
आइतबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको बैठक, जसको अध्यक्षता आयोगकी अध्यक्ष समेत रहेकी प्रधानमन्त्री सुशीला कार्कीले गरिन्, ले कुल २ हजार ३० सिट टुंग्याएको हो। आयोगले सरकारीतर्फ १८ कलेजलाई १,०३१ सिट र निजीतर्फ २७ कलेजलाई ९९९ सिट दिने निर्णय गरेको छ।
बैठकपछि सञ्चारकर्मीहरूसँग कुरा गर्दै शिक्षा, विज्ञान तथा प्रविधिमन्त्री महावीर पुनले कलेज–वार सिट निर्धारणबारे विस्तृत छलफल भएको बताए। उनका अनुसार सरकारी कलेजहरूलाई एक हजारभन्दा बढी र निजी कलेजहरूलाई करिब एक हजार सिट दिनेगरी सन्तुलित विभाजन गरिएको छ।
मन्त्री पुनले आयोगभित्र यस निर्णयबारे सबैजना सन्तुष्ट रहेको उल्लेख गरे। उनले भने, “पोस्ट ग्राजुएट पढ्ने विद्यार्थीहरूको कुन कलेजलाई कति सिट दिने भनेर विस्तृत छलफल भयो। सरकारी कलेजलाई करिब हजारभन्दा अलि बढी र निजीलाई हजारभन्दा अलिकति कम सिट तोकिएको छ। माथिल्लो तहबाट यति ठूलो संख्यामा सिट निर्धारण गर्नु आफैंमा ठूलो काम हो। सबै सहभागी खुसी छन्। सबैलाई सिट संख्या पुगेको छ।”
