बैतडी–स्वास्थ्य कार्यालय बैतडीले आफ्ना हरेक कार्यक्रमहरुमा योग कक्षा र योगाभ्यास सञ्चालन गर्न थालेको छ ।
स्वास्थ्य कार्यालयले आयोजना गर्ने हरेक तालिममा योग कक्षा साथै सहभागीहरुलाई योगाभ्यास गराउने नीति लिएको स्वास्थ्य कार्यालय बैतडीका प्रमुख तीर्थराज भट्टले बताए ।
पछिल्लो समयमा नसर्ने रोग र मानसिक समस्याहरु बढ्दै गएकाले यस्ता समस्याहरुको समाधानमा योग प्रभावकारी उपाय भएकाले योगाभ्यास र योग कक्षा सञ्चालन गर्ने गरिएको उनले बताए ।
पतञ्जली योग समिति शाखा कार्यालय बैतडीसंगको समन्वयमा स्वास्थ्यका हरेक कार्यक्रममा योग कक्षा र योगाभ्यास शुरु गरिएको स्वास्थ्य कार्यालय बैतडीका प्रमुख भट्टले बताए । तालिम, समीक्षा तथा गोष्ठीमा सहभागीहरुलाई हरेक दिन योगाभ्यासमा सरीक गराउने र कक्षा समेत सञ्चालन गरिने भट्टले बताए ।
नसर्ने रोग तथा मानसिक समस्याहरुबाट मुक्ति पाउन औषधिमात्रै पार्याप्त नभएकाले रोग लाग्न नदिन र लागेका रोगहरु नियन्त्रणका लागि योग प्रभावकारी माध्यम भएको भट्टले बताए । स्वास्थ्य कार्यालयले सञ्चालन गर्ने हरेक कार्यक्रममा योगलाई प्राथमिकता दिएर नौलो अभ्यास शुरु गरिएको स्वास्थ्य प्रमुख भट्टले बताए । उनले भने,‘योगले मानिसलाई स्वस्थ राख्न मद्दत गर्दछ । पछिल्लो समयमा चुनौतीको रुपमा देखिएका नसर्ने रोग र मानसिक स्वास्थ्य समस्याहरुमा यसले प्रभावकारी काम गर्दछ ।’
पछिल्लो समयमा बैतडीमा पनि योगको लहर चलेको पतञ्जली योग समिति शाखा बैतडीका प्रमुख दुर्गादत्त जोशीले बताए । योगका माध्यमबाट स्वस्थ जीवनशैली अपनाउन सकिने भएकाले योगको लहर चलेको उनले बताए ।