काठमाडौँ – पाटन अस्पतालले क्यान्सरका बिरामीलाई लक्षित गर्दै महँगा औषधि निःशुल्क रूपमा उपलब्ध गराउँदै आएको खुलासा भएको छ। राजधानीमा आयोजित कार्यक्रममा क्यान्सर विशेषज्ञ डा. अरुण शाहीले यस्तो जानकारी दिएका हुन्।
ख्यातिप्राप्त गायिका मीरा राणाले स्थापना गरेको ‘मीरा राणा क्यान्सर समाज’बारे जानकारी दिने क्रममा डा. शाहीले एक अमेरिकी संस्थाको सहकार्यमा अस्पतालले विभिन्न प्रकारका क्यान्सर औषधि निःशुल्क वितरण गरिरहेको बताए। बिरामीहरूको आर्थिक अवस्थालाई ध्यानमा राख्दै आवश्यक उपचारमा सहजता ल्याउने उद्देश्यले यस्तो व्यवस्था गरिएको उनले स्पष्ट पारे।
उनका अनुसार अमेरिकास्थित म्याक्स फाउन्डेसनको सहयोगमा पाटन अस्पतालले क्यान्सरका १३ प्रकारका औषधि प्राप्त गर्दै आएको छ। बजारमा मासिक १०–१५ हजार रुपैयाँदेखि १०–१५ लाख रुपैयाँसम्म पर्ने यी महँगा औषधि बिरामीलाई निःशुल्क उपलब्ध गराइँदै आएको छ।
अस्पतालमा स्तन क्यान्सर, फोक्सोको क्यान्सर, मिर्गौला क्यान्सर, पेटसम्बन्धी क्यान्सरका साथै रक्त क्यान्सरअन्तर्गत क्रोनिक माइलोइड ल्युकेमिया र क्रोनिक लिम्फोसिटिक ल्युकेमियाजस्ता रोगका बिरामीलाई लक्षित गरी थेरापीसम्बन्धी औषधि उपलब्ध गरिँदै आएको डा. शाहीले बताए।
यस पहलले क्यान्सर बिरामीको उपचार खर्चमा ठूलो राहत पुगेको छ भने उपचारमा पहुँचसमेत सहज भएको छ। स्वास्थ्य सेवामा यसलाई सकारात्मक र उदाहरणीय अभ्यासका रूपमा हेरिएको छ।