काठमाडौँ – बेलायतमा गैर–शल्यक्रियामार्फत गरिने ‘ब्राजिलियन बट लिफ्ट (बीबीएल)’ सौन्दर्य उपचारको सुरक्षा र नियमनमाथि गम्भीर प्रश्न उठेको छ। ३३ वर्षीया एलिस वेबको यस्तो उपचार गराएको २४ घण्टाभित्र मृत्यु भएपछि बेलायतमा पहिलो पटक गैर–शल्यक्रियात्मक बीबीएलसँग जोडिएको मृत्युको घटना सार्वजनिक भएको हो।
एलिस पाँच सन्तानकी आमा थिइन्। उनी सन् २०२४ को सेप्टेम्बरमा एक अस्थायी क्लिनिकमा डर्मल फिलर प्रयोग गरी गरिने ‘लिक्विड बीबीएल’ उपचारका लागि पुगेकी थिइन्। सामान्य उपचार गरेर त्यही दिन घर फर्कने योजना बनाएकी एलिसको उपचारपछि स्वास्थ्य अवस्था अचानक बिग्रिएको र २४ घण्टाभित्र मृत्यु भएको थियो। घटनाबारे औपचारिक अनुसन्धान सुरु गरिएको छ।
यस घटनापछि बेलायतमा तीव्र गतिमा फैलिरहेको सौन्दर्य उपचार उद्योगको नियमनमाथि बहस चर्किएको छ। अनुसन्धानका क्रममा अस्थायी क्लिनिक, ब्यूटी सैलुन र होटलका कोठासम्म यस्ता उपचार सञ्चालन भइरहेको तथा पर्याप्त चिकित्सकीय योग्यता नहुने व्यक्तिले समेत डर्मल फिलर प्रयोग गरिरहेको तथ्य खुलेको छ।
बीबीसीको अनुसन्धानअनुसार धेरै महिलाले यस्ता उपचारपछि संक्रमण, सेप्सिस, अस्पताल भर्ना हुनुपर्ने अवस्था र स्थायी शारीरिक क्षति भोगेका छन्। केही बिरामीलाई गम्भीर संक्रमणका कारण शल्यक्रिया नै गर्नुपरेको थियो।
विशेषज्ञहरूले बेलायतमा डर्मल फिलरसम्बन्धी नियम कमजोर भएकाले जोखिम बढेको बताएका छन्। हालको कानुनअनुसार सामान्य तालिम लिएपछि चिकित्सकीय योग्यता नभएका व्यक्तिले पनि कानुनी रूपमा डर्मल फिलर प्रयोग गर्न सक्ने व्यवस्था छ, जसले बिरामीको सुरक्षामाथि गम्भीर चुनौती सिर्जना गरेको उनीहरूको भनाइ छ।
स्वास्थ्य विज्ञहरूले सौन्दर्य उपचारलाई सामान्य ब्यूटी सेवाका रूपमा नलिएर चिकित्सकीय प्रक्रिया मानेर मात्र योग्य विशेषज्ञबाट गराउन तथा नियमन थप कडा बनाउन सरकारसँग माग गरेका छन्।
