काठमाडौं – नेपाल सरकार, भारतीय दूतावास र नौ स्थानीय तहबीच शिक्षा तथा स्वास्थ्य क्षेत्रमा सहयोग गर्न त्रिपक्षीय सम्झौतामा हस्ताक्षर भएको छ । मंगलबार सिंहदरबारमा आयोजित कार्यक्रममा सम्झौताअनुसार भारत सरकारले नौ स्थानीय तहमा विद्यालय र स्वास्थ्य चौकी निर्माणका लागि आर्थिक सहायता उपलब्ध गराउनेछ ।
संघीय मामिला तथा सामान्य प्रशासन मन्त्रालयका प्रवक्ता कालीप्रसाद पराजुलीका अनुसार हुम्लाको चंखेली गाउँपालिकामा पाँच शय्याको अस्पताल निर्माण गर्न भारत सरकारले आर्थिक सहयोग गर्नेछ । गाउँपालिका अध्यक्ष प्यारीलाल शाहीले अस्पताल निर्माणका लागि प्रस्ताव स्वीकृत भइसकेको जानकारी दिए ।
अस्पताल निर्माणपछि दुर्गम क्षेत्रमा बसोबास गर्ने नागरिकलाई सहज स्वास्थ्य सेवा उपलब्ध हुने बताइएको छ । नेपाल सरकारको कानूनअनुसार प्रक्रिया अघि बढाइनेछ, जसअनुसार डीपीआर तयार भइसकेको छ र टेन्डर आह्वान गरिनेछ । अनुमानित लागत २० करोड रुपैयाँ रहेको यो अस्पताल १८ महिनाभित्र सम्पन्न गर्ने लक्ष्य छ ।