विराटनगर- कोशी प्रदेश सरकारले गम्भीर रोगबाट पीडित बिरामीहरूलाई प्रदान गर्दै आएको सहयोग रकम वितरण गर्ने निर्णय गरेको छ। शुक्रबार बसेको मन्त्रिपरिषद् बैठकले थप ८ करोड ६० लाख रुपैयाँ निकासा गर्ने निर्णय गर्दै बिरामीहरूलाई सहायता रकम उपलब्ध गराउने निर्णय गरेको हो।
प्रदेश सरकारका प्रवक्ता तथा आन्तरिक मामिला तथा कानुन मन्त्री रेवती रमण भण्डारीका अनुसार यो पटकको सहयोग वितरणपछि आगामी वर्षदेखि फरक तरिकाबाट सहायता प्रदान गर्ने नीति अपनाइनेछ।
त्यस्तै, मन्त्रिपरिषद् बैठकले फागुन २७ गते प्रधानमन्त्री केपी शर्मा ओलीले प्रदेश सभामा गर्ने सम्बोधनको तयारी गर्न प्रदेश सभालाई आग्रह गर्ने निर्णय गरेको छ।
यसैगरी, प्रदेशमा आएका सचिव रामप्रसाद आचार्यलाई आन्तरिक मामिला तथा कानुन मन्त्रालयमा तथा सचिव पवनकुमार तिम्सिनालाई मुख्यमन्त्री तथा मन्त्रिपरिषद्को कार्यालयमा खटाउने निर्णय गरिएको छ।
साथै, बैठकले धनकुटा नगरपालिका र चीनको फुझाउ सहरबीच भगिनी सम्बन्ध स्थापना गर्न परामर्श दिने तथा कोशी पर्यटन वर्षका लागि विनियोजित बजेटको स्रोतगत बाँडफाँट गर्ने निर्णय समेत गरेको छ।