काठमाडौं- राष्ट्रिय आविष्कार केन्द्रले देशभरका संघीय अस्पतालहरूमा बिग्रिएर प्रयोगविहीन भएका पाँच सय उपकरण मर्मत गरी पुनः सञ्चालनमा ल्याएको छ ।
स्वास्थ्य मन्त्री प्रदीप पौडेलले गत भदौ १८ गते केन्द्रका प्रमुख महावीर पुनसँग सम्झौता गर्दै १७ वटै संघीय अस्पतालका बिग्रेका उपकरणहरूको अध्ययन र मर्मतको जिम्मा दिएका थिए । सम्झौतापछि हालसम्म १० वटा संघीय अस्पतालमा उपकरण मर्मत कार्य सम्पन्न भइसकेको छ ।
केन्द्रका इञ्जिनियर उमेश किरातीका अनुसार ६६१ वटा उपकरणको मूल्यांकन गरिएकामा पाँच सयको मर्मत कार्य पूरा भएको छ। यसका लागि केन्द्रले २३ लाख २० हजार रुपैयाँ खर्च गरेको छ ।
मर्मत कार्यमा सामान्य तार जडानदेखि लिएर जटिल मर्मतसमेत गरिएको छ । आवश्यक थप सामग्री मगाएर सञ्चालनमा ल्याइएका यी उपकरणहरूले अस्पतालहरूको सेवा पुनः प्रभावकारी बनाउन मद्दत गर्ने अपेक्षा गरिएको छ ।