जनकपुरधाम- मधेश प्रदेशका सरकारी अस्पतालहरूको स्तरोन्नति र अवैध निजी अस्पतालहरू बन्द गरिनुपर्ने मागसहित जनकपुरधाममा प्रदर्शन भएको छ । राष्ट्रिय एकता अभियानको आयोजनामा मंगलबार साँझ प्रादेशिक अस्पतालअगाडि विरोध प्रदर्शन गर्दै प्रदर्शनकारीहरूले मुख्यमन्त्री सतिस कुमार सिंहको पुतला जलाएका छन् ।
स्वास्थ्य क्षेत्रमा व्याप्त बेथिति, सरकारी अस्पतालहरूको लचर अवस्था र निजी अस्पतालहरूको अनियन्त्रित व्यावसायीकरणप्रति असन्तुष्टि जनाउँदै प्रदर्शन गरिएको हो। अभियानका नेताहरू मनिष पुर्वे, अक्षय यादव, दीपू झा, पंकज झा लगायतको नेतृत्वमा भएको प्रदर्शनमा सयौँ स्थानीयवासीको सहभागिता रहेको थियो ।
प्रदर्शनकारीहरूले ‘सरकारी अस्पताल सुधार गर, निजी अस्पतालको मनपरी बन्द गर’ जस्ता नाराहरू लगाउँदै सरकारको आलोचना गरे । उनीहरूले सरकारी अस्पतालहरूमा आवश्यक स्वास्थ्य उपकरण, दक्ष चिकित्सक तथा गुणस्तरीय सेवा नहुँदा बिरामीहरूलाई निजी अस्पतालमा पठाउने प्रवृत्ति मौलाउँदै गएको गुनासो गरे ।
प्रदर्शनकारीहरूले सरकारलाई अस्पताल सुधारको दायित्वबाट विमुख हुन नदिन चेतावनी दिएका छन् । उनीहरूका अनुसार सरकारी अस्पतालहरूलाई योजनाबद्ध रूपमा कमजोर बनाएर निजी अस्पतालहरूलाई फाइदा पुर्याउने षड्यन्त्र भइरहेको छ । ‘स्वास्थ्य सेवा नागरिकहरूको मौलिक अधिकार हो, यसलाई व्यवसायीकरण गर्न पाइँदैन,’ प्रदर्शनकारीहरूले भने ।
नियम विपरीत सञ्चालनमा रहेका निजी अस्पतालहरूको छानबिन गरी तत्काल कारबाही गर्नुपर्ने माग गर्दै उनीहरूले प्रदेश सरकार र स्वास्थ्य मन्त्रालयलाई जवाफदेही बन्न आग्रह गरे ।