काठमाडौँ- निजी स्वास्थ्य संस्थाहरूको छाता संगठन एसोसिएशन अफ प्राइभेट हेल्थ इन्स्टिट्युसन अफ नेपाल (अफिन) ले हाल स्वास्थ्य क्षेत्रमा उत्पन्न परिस्थितिप्रति गम्भीर ध्यानाकर्षण गराउँदै तत्काल संवादमार्फत समाधान खोज्न सरकार तथा सम्बन्धित निकायलाई आग्रह गरेको छ।
अध्यक्ष डा. पदमबहादुर खड्काद्वारा हस्ताक्षरित प्रेस विज्ञप्तिमा स्वास्थ्यजस्तो संवेदनशील क्षेत्रलाई सेवाविमुख बनाउने गतिविधिलाई रोक्न समेत सबै पक्षलाई सचेत रहने अपिल गरिएको छ।
विज्ञप्तिमा भनिएको छ, ‘प्रजातन्त्र आएपछि उदार अर्थनीति लागू भएपछि निजी लगानीमा स्थापना भएका स्वास्थ्य संस्थाहरूले करिब १ लाखभन्दा बढी रोजगारी सृजना गर्दै राष्ट्रको ६५ प्रतिशत नागरिकलाई आधुनिक स्वास्थ्य सेवा पुर्याइरहेका छन्।’
देशभर ४०१ निजी अस्पताल, करिब २० हजार शय्या, दर्जनौँ मेडिकल कलेज र ३६५ प्यारामेडिक्स शिक्षा संस्थाहरू मार्फत दक्ष जनशक्ति उत्पादन भई राष्ट्रलाई ठूलो सहयोग पुगेको अफिनको दाबी छ। यसले ठूलो परिमाणमा विदेशीने स्वदेशी पुँजीलाई रोक्दै राजश्वमा समेत योगदान गरिरहेको संगठनले जनाएको छ।
तर पछिल्लो समय पारिश्रमिकका मुद्दालाई लिएर केही मेडिकल कलेजहरूमा सृजित आन्दोलनले स्वास्थ्य प्रणाली नै प्रभावित बन्ने खतरा देखिएको अफिनको बुझाइ छ। आन्दोलनका क्रममा बार्ता तथा छलफलमा देखिएको अपमानजनक व्यवहारले निजी क्षेत्रलाई नै धराशायी बनाउने अदृश्य योजनाप्रति पनि शंका उत्तेजित भएको विज्ञप्तिमा उल्लेख छ।
अफिनले सहमतिका निर्णयहरूको कार्यान्वयनमा आफूहरू प्रतिबद्ध रहेको दोहो¥याउँदै “एकतर्फी निर्देशन तुरुन्त लागू गर्न सम्भव छैन, पर्याप्त संवाद आवश्यक छ” भनेर सरकारको ध्यानाकर्षण गराएको छ।
