काठमाडौं- सामान्यतया जीवनलाई सन्तुलित राख्न ८ घण्टा काम, ८ घण्टा आराम र ८ घण्टा मनोरञ्जन भन्ने सिद्धान्तलाई उत्तम मानिन्छ। आयुर्वेद र शास्त्रले पनि यसलाई स्वस्थ जीवनशैलीका रूपमा स्वीकृति दिएका छन्। यद्यपि, यी समयहरू दिनचर्याअनुसार मिलाउनु आवश्यक हुन्छ। विशेष गरी रातिको समयमा सुत्नु र दिउँसो काम गर्नु स्वास्थ्यका दृष्टिकोणले लाभदायक मानिन्छ।
तर, धेरै व्यक्ति कामको प्रकृति वा बानीका कारण दिउँसो सुत्ने गर्छन्। विशेषतः रातिमा काम गर्नेहरू वा थकान महसुस गर्नेहरू दिउँसो आराम गर्छन्।
तर शास्त्र र आयुर्वेदका अनुसार दिउँसो सुत्नु शरीरका लागि हानिकारक हुनसक्छ। आयुर्वेदको मान्यता अनुसार दिउँसो सुत्दा पाचन प्रणालीमा असर पर्छ, जसले गर्दा ग्यास, कब्जियत, अपचजस्ता समस्याहरू देखापर्छन्।
त्यस्तै, दिउँसो सुत्दा स्मरण शक्ति कमजोर हुने, अंग फुल्ने, ज्वरो आउने, गलाको समस्या देखिने, र आलस्य बढ्ने सम्भावना पनि रहने आयुर्वेदमा उल्लेख गरिएको छ।
धार्मिक मान्यताका अनुसार पनि दिउँसो सुत्न नहुने बताइन्छ। मान्यता अनुसार दिउँसो सुत्ने मानिसको घरमा लक्ष्मीको बास रहँदैन।
यद्यपि, वृद्धवृद्धा, बिरामी, र साना बालबालिकाका लागि भने दिउँसो सुत्नु फाइदाजनक र आवश्यक मानिन्छ। यस्तो अवस्थामा शरीरलाई आवश्यक आराम मिल्नुपर्ने हुँदा दिउँसोको निन्द्रा उपयुक्त ठहरिन्छ।