सर्लाही, लालबन्दी — सर्लाहीको लालबन्दी नगरपालिका–१ स्थित नवलपुर सर्पदंश उपचार केन्द्रमा आधुनिक स्वास्थ्य उपकरण यथेष्ट रूपमा उपलब्ध भए पनि, ती उपकरण प्रयोग गर्न सक्ने दक्ष जनशक्तिको अभावले स्वास्थ्य सेवा प्रभावकारी हुन सकेको छैन।
उपचार केन्द्रमा भेन्टिलेटर, आइसियुजस्ता अत्यावश्यक उपकरण झन्डै छ वर्षदेखि जडान भएर बसेका छन्, तर प्रशिक्षित चिकित्सकको अभावमा ती उपकरण हालसम्म प्रयोगमा आउन सकेका छैनन्। यस्ता उपकरण समयमै चलाउन नपाउँदा गम्भीर अवस्थामा रहेका बिरामीहरू जोखिममा पर्दै आएका छन्।
केन्द्रका अध्यक्ष उद्धवप्रसाद पौडेलका अनुसार, योग्य चिकित्सक नियुक्त गर्नका लागि केन्द्रले पटक–पटक विज्ञापन खुलाउने, परीक्षा लिने लगायत प्रयास गरेको छ। तर, योग्य उम्मेदवारको कमीका कारण सेवा सञ्चालन हुन सकेको छैन। हालै लिइएको परीक्षामा पाँच जनामध्ये एक मात्र उत्तीर्ण भए पनि उनले पनि काम सम्हाल्न अस्वीकार गरेका छन्।
केन्द्रमा सरकारले सर्पदंश उपचारका लागि एन्टिस्नेक भेनम उपलब्ध गराए पनि अन्य औषधि र सेवा सञ्चालन खर्च भने केन्द्रले आफ्नै स्रोतबाट व्यवस्थापन गर्नुपरेको छ। बिरामीहरूबाट उपचार शुल्कका रूपमा रु २,५०० लिइन्छ भने आजीवन सदस्यहरूलाई रु ५०० शुल्क निर्धारण गरिएको छ।
यसबीच, लालबन्दी, हरिवन, ईश्वरपुर र हरिपुर नगरपालिकासहितका केही वडाहरूले बजेट सहयोग गर्दै आइरहे पनि दक्ष जनशक्तिको अभावले सेवा अवरुद्ध भइरहँदा जनस्वास्थ्य जोखिममा परेको स्थानीयवासीको गुनासो छ।
संरचना भए पनि सञ्चालन नहुँदा स्वास्थ्य पूर्वाधारमा लगानी व्यर्थ हुने अवस्था आएको भन्दै अब प्रदेश वा संघीय सरकारले प्रत्यक्ष ध्यान दिनुपर्ने आवाज चुलिंदै छ।