बुटवल- लुम्बिनी प्रादेशिक अस्पताल बुटवलमा अव हप्ताको सातै दिन प्रसुति शल्यक्रिया सेवा उपलब्ध हुने भएको छ । अस्पतालले प्रसुति सेवाका लागि छुट्टै अपरेशन कक्ष सञ्चालनमा ल्याएपछि सातै दिन प्रसुति सेवा शल्यक्रियाको सुविधा उपलब्ध गराउने भएको हो ।
अस्पतालमा आठ शैयाको रिकभरी वार्ड तथा १५ शैयाको पोष्ट अपरेटिभ शैयासहित नयाँ शल्यक्रिया कक्ष सञ्चालमा आएको छ । अब हप्ताको सात दिन प्रसुति सेवातर्फ शल्यक्रिया सेवा उपलब्ध गराउने अस्पतालले बताएको छ । सञ्चालनमा ल्याइएको नयाँ शल्यक्रिया कक्षमा एक वटा शल्यक्रिया कक्ष तथा दुईवटा ठूलो शल्यक्रिया कक्ष रहेको स्रोतले जनायो ।
अस्पतालबाट विगत तीन वर्षदेखि बार्षिक ९ हजार बढी बिरामीले शल्यक्रिया सेवा लिँदै आएका छन् । अब प्रसुतिका लागि छुट्टै शल्यक्रिया कक्षा बनेपछि ३३ प्रतिशतले शल्यक्रियाको सेवा वृद्धि हुने अस्पतालले अपेक्षा राखेको छ ।
तथ्यांकअनुसार पछिल्लो आर्थिक वर्ष २०८०–८१ मा ९ हजार ७ सय ६५ शल्यक्रियामध्ये चार हजार ५४७ वटा शल्यक्रिया प्रसुति सेवातर्फको रहेको छ ।
अस्पतालमा प्रसुती सेवाका लागि पछिल्लो आर्थिक वर्षमा १२ हजार ९८ जनाले सेवा लिएकामध्ये सात हजार ५ सय ४८ जनाले सामान्य रुपमा बच्चा जन्माएका छन् । अस्पतालमा सेवाग्राहीको चाप बढेसँगै सेवा बिस्तारलाई पनि प्राथमिकता दिइएको अस्पतालले जनायो ।
पछिल्लो आर्थिक वर्षमा लुम्बिनी प्रादेशिक अस्पतालबाट तीन लाख ४८ हजार ९ सय ७१ जनाले स्वास्थ्य उपचार सेवा लिएको अस्पतालले जनाएको छ । अस्पतालमा प्रसुति तर्फको शल्यक्रिया कक्ष बिस्तार गरेसँगै अव महिनौं पालो कुर्नुपर्ने समस्या धेरै समाधान हुने अस्पतालको दाबी छ ।
अस्पतालका अनुसार शल्यक्रिया कक्ष बिस्तारसँगै विगतमा सातामा दुई दिन हुने हाडजोर्नीसम्बन्धी शल्यक्रिया अब सातामा तीन दिन हुनेछ । सोहीअनुसार शल्यक्रियातर्फ नाक, कान, घाँटीसम्बन्धि शल्यक्रियाका लागि पनि सातामा तीन दिन पालो आउने छ ।